又回娘家食飯喇,今次又留左一個餸比我煮,爸爸有日同朋友食飯食左三杯雞話好好味,想試下整喎,咪就係叫我試下整囉!!我覺得好易煮啊,一d都唔難煮,而且又惹味送飯勁正,我之前從未食過,味道真係幾好!!爸媽食完都話得呀!!食譜由爸爸提供,加上我煮時有佢嚴厲監督一定唔會失手啦

材料:

1. 雞一隻
2. 薑片 5片
3. 蒜頭 5粒
4. 紅蔥頭2粒
5. 青蔥2條
6. 麻油 50 ml
7. 老抽 50 ml
8. 米酒 80 ml
9. 蜜糖 少許(原身係冰糖或紗糖,但爸爸改左,話會好味d)

做法 :

1. 先將雞斬件,再將薑切片,青蔥切段,蒜頭蔥頭稍為拍一拍
2. 將油燒熱用薑與蒜同蔥頭爆香後 , 加雞件略炒，炒到有少少金黃色後 ,先鑽一半米酒隨即加入麻油、老抽 , 轉用小火加蓋焗一焗(最好試一試味) , 最後加青蔥 , 蜜糖 , 再鑽剩餘既米酒煮至收乾,即成!!

加蓋焗雞既時候,小心收乾晒水,要留意住 , 因為份量是爸爸諗出黎,唔知岩岩你地既口味,所以最好試一試先!!

之前整左潮州粉果,我覺得個皮整得麻麻地,死唔份氣,又黎挑戰下呢個"澄粉"整既皮,整咩餃好呢老板之前買左一盒帶子仔(小柱)番黎,好就整帶子餃啦今次,平時外面就食豆苗帶子餃多,但而家比較難買到豆苗,所以今次轉左用菠菜整喇!!今次用左另一個包法,比之前易包呢!!蒸好喇蒸好喇........嘩!!好透明呀快d試食先........老板話呢個味道真係好好呀,個皮呢??今次比上次好多了,無上次整得咁厚,比上次既軟熟,個餡味道好夾呀,哎呀!!好開心呢都幾滿意呀今次

皮材料:澄麵300g , 生粉100g , 滾水400ml , 油 2湯匙 , 幼鹽少許

皮做法 : 將澄麵、生粉篩過、加入滾水快速搞勻，蓋著約5分鐘，加入油搓成軟滑粉糰,係搓時係檯上灑上少許澄粉,咁樣唔會令皮回縮,唔用時最好用擰乾既濕布蓋保濕,如果唔係皮好易烈開(上次無咁做到,今次爸爸教的)

餡材料:

1. 蝦膠(蝦 30隻)
2. 帶子仔 10隻
3. 菠菜 3棵

蝦膠做法: 先除蝦殼後洗淨挑腸 , 把蝦用毛巾盡量索去水份 , 用刀將蝦拍薑咁拍攔 , 然後放在碗上 , 加半茶匙鹽、少少胡椒粉及半茶匙生粉調味 , 順時針攪勻 , 然後拎起蝦撻至起膠 , 放入雪櫃最少1個鐘 , 蝦膠就會爽口彈牙

餡料做法:

1. 準備蝦膠
2. 帶子切細粒(睇自己鐘意咩口感黎切)
3. 菠菜,煲滾少少水 , 落菠菜大概煮10秒,然後索乾水切細
4. 將所有材料加咪,然後加麻油半湯匙 ,少少胡椒粉 , 1茶匙雞粉, 搞勻備用

做法:

1. 將粉糰分成2-3份,而每份再分成小粒 , 輾薄成圓形 , 包入適量之餡料 , 對接按實 ,餡料盡量向中間推 , 然後將兩隻角屈向下,痴實兩隻角,便成飛碟型 !! 放入已掃油之蒸籠或焗爐紙以免黏厎 , 大火蒸約8分鐘即成

各位我番黎喇,呢幾日咁懶去左邊??咪就係約左感冒菌囉,病左幾日wing左幾日仲訓左幾日tim,今日精神好多了,老板都有幾日無好野食,今日就整番d好野佢食先!!之前行街買左d澄粉,未試過整呢個皮架,就試下整啦!!皮唔難搓呀,我覺得包果時有少少難包,又唔可以太薄會爆開,但又唔可以太厚,怕唔好食,所以我覺得包得唔算好靚.....快手蒸黎試下先!!唔........老板話個皮都係厚左少少,我都覺,不過味道係唔錯架,幾有酒樓feel,加咪潮州辣椒油黎食仲正呀!!我自己今次唔算十分滿意,因為個皮厚左少少,但味道就無問題,下次我會努力再整好d架喇!!

皮材料:澄麵300g , 生粉100g , 滾水400ml , 油 2湯匙 , 幼鹽少許

皮做法 : 將澄麵、生粉篩過、加入滾水快速搞勻，蓋著約5分鐘，加入油搓成軟滑粉糰待用

餡材料:

1. 炸花生少許
2. 梅頭瘦肉$10
3. 蝦米/蝦乾大約10隻浸軟(我今次用左蝦乾,用蝦米可以放多少少)
4. 菜莆買左$3
5. 芫荽3棵
6. 細沙葛1個

餡料獻汁:

五香粉1湯匙 , 麻油半湯匙+水2湯匙+生粉半湯匙 , 除五香粉其餘搞勻待用

餡料做法:

1. 先張全部餡料切粒
2. 瘦肉以豉油、糖、胡椒粉、生粉、雞粉稍醃
3. 以蒜頭起鑊先爆香蝦乾&菜莆 , 再落瘦肉炒至8成熟, 再加沙葛 , 然後先落五香粉略炒
4. 最後加個麻油汁,千其唔可以太多水份,獻汁岩岩包住餡料就得, 試味即成 !!盛起餡料備用 , 最後再撈埋芫荽(唔洗炒)就得喇!
5. 將粉糰分成大小相同之小粒 , 輾薄成圓形 , 包入適量之餡料 , 收口 !! 放入已掃油之蒸籠或焗爐紙以免黏厎 , 大火蒸約5-6分鐘

1. 粉果餡料唔可以太多油 , 汁亦唔可以太多, 餡料要八、九成熟或全熟
2. 粉果不可蒸得過久, 如果唔係皮好易會爆裂
3. 整皮時落滾水小心燙手 , 同咪要快手搞勻

早幾日約左朋友去食tea,佢專登叫我試下呢個!!食左一個叫"炸火腿芝士釀豬扒",聽就成日聽但一次都未食過,覺得好好食,味道幾夾!!於是我就買左幾件豬扒,整比老板試下,因為老板應該都無食過!!一d都唔難整,好易整!!老板食完話好正,好香口同咪d芝士一咬落去就流出黎,好鬼正,芝士同豬扒好夾呀,老板話個樣炸完好似"漢堡包"喎,所以老板幫佢改左個名叫"炸豬扒漢堡",都幾好聽!!不過佢話如果吉列會再香口d喎,但而家都好脆!!但我怕熱氣嘛!!好啦...下次試下"吉列豬扒漢堡"啦...........等下啦你!!

材料：

• 豬扒 4 件
• 火腿 4 片
• Parmesan Cheese 4 片/普通芝士片

調味料：

• 生抽 1 湯匙,
• 酒 1 茶匙
• 雞粉 1 茶匙
• 糖 1 茶匙,
• 薑茸半荼匙
• 粟粉 1 湯匙
• 水 2 湯匙
• 油 1 湯匙
• 咖哩粉1/4茶匙(要咖哩香,唔係要辣)
• 蛋白 1 隻 (蛋黃留用)

做法：

1. 豬扒用槌或刀背拍鬆 , 盡量拍成長方形 , 加入調味料醃最少 1 小時 (我醃左1晚)
2. 留用蛋黃打勻 , 備勻
3. 豬扒對接 , 中間夾入芝士和火腿
4. 先沾上蛋黃 , 然後拍上麵粉
5. 中慢火燒熱油 , 放入豬扒炸至金黃色 , 轉大火略炸 , 上碟前吸走多既餘油 , 即成

去完旅行番黎都無整過野食,好懶呀!!唔得.......今日(的)起心肝,搵d野搞下先!!老公話好想食甜野,但我又無咩甜品既料係到,但我又好想整點心啵!!夠料整千層糕又甜既,不如就整奶皇千層糕啦!!

嘩!!都唔好話,都要幾花心機整架,整時都有少少難,不過功夫多d!!蒸好喇.....切黎睇下先,幾靚仔喎,試食先..........,味道唔錯,幾好食又唔會太甜!!老板都好滿意咁話好味呀!!

麵包材料:

1. 麵粉 200g ,發粉 2g
2. 糖 2湯匙
3. 油 1湯匙
4. 鮮奶 100ml
5. 乾酵母 3g ,鹽少許 ,溫水 30ml

奶皇材料:

1. 吉士粉 30g
2. 糕粉 30g
3. 糖 40g
4. 鹹蛋黃 2隻(先煮熟,再搓爛)
5. 雞蛋黃 2隻
6. 鮮奶 60ml
7. 椰子絲 30g
8. 牛油 30g (煮溶)

麵包做法:

1. 先將麵包材料(5)加咪一齊,靜待10分鐘待用
2. 再將麵粉+發粉過篩,加入糖,慢慢加入酵母水及鮮奶,把粉團搓至完全沒有乾粉,最後加入油搓至光滑
3. 將粉團放入盤內用濕布蓋上,靜待60分鐘

奶皇做法:

1. 雞蛋黃同鮮奶搞勻,然後將所有材料加入,搞至完全混合

千層糕做法:

1. 發酵完後,將麵團拎出,略為再搓,分成4份,然後用木棒碌平
2. 用一個長型糕盤,放上牛油紙,放下一份麵皮,再加上適量奶皇餡,如此類推直至頂層係麵包皮為止,千層糕等5分鐘後再蒸(目的令包可以鬆軟d)
3. 大火蒸30分鐘,待糕放涼後切成小件,即成

如身有糖冬瓜,但臨時整,所以無加!!鐘意有咬口可以加欖仁,松子仁等

今日至靚既媽咪生日,祝佢生日快樂,最緊要身體健康!!

我地一家人,有我啦,我老公,爸爸,媽咪,亞嫂去左哥哥公司到食飯同媽咪慶祝!!食食下飯姑媽都黎左(住好近架姑媽散步散散下就黎左喇),飲左好多酒呀我地,老板娘好好呀知道媽咪生日送左個蛋糕比媽咪,媽咪好開心,笑唔停呀佢!!我地一家人似樣嘛??由於野食太多,掛住食影唔晒,只能post少量!!因為太好味喇!!

哥哥係日本串燒既大廚黎架,佢燒既野真係好得架,好正!!

哥哥燒野好有型雞亦&白鱔

日本蕃茄羊扒 牛肋骨媽咪爸媽&哥&我媽咪&哥媽咪&哥&我一家人媽&我爸媽&姑媽&我爸媽,嫂

呢個海南雞飯,係去旅行前番娘家食飯時整既,睇完密友j師奶既雞油飯之後,唔敢偷懶即時post番出黎(去完旅行好懶呀個人),話說因為我去海南島旅行,所以我屋企人又話要食海南雞飯,但係我話唔關事架啵,海南島係食文昌雞,馬來西亞先係食海南雞飯架啵,根住佢地就話喇,我唔理啦,總知要食海南雞飯,你整黎試下啦!!下......咁都得老屈呀,好再亞哥識整,佢就係隔離一路講,我就一路整囉,試食時間........爸媽話唔錯唔錯,味道幾好,由其個酸汁好好味呀,雞又好滑,飯又好香啵,連我唔tim飯,都食多左半碗,呢個好易整,由於我唔識斬全雞,就用左雞脾啖啖肉,好好味呀!!食譜由我既大廚亞哥提供

材料 : 雞脾 5隻只 , 蔥 10 棵 ,薑 1舊 , 蒜頭 10粒 , 乾蔥4粒, 青檸半個,米 3杯 ,紅辣椒 3隻

薑蔥茸：(薑茸、蔥花、雞粉及鹽放在碗內，倒入滾油拌勻即成)

• 薑茸 取材料少量磨成茸
• 蔥花 取材料2棵切細 
• 雞粉 適量
• 鹽 適量
• 熟油 適量

海南雞酸汁：(將全部材料拌勻即成)

• 魚露 2 湯匙
• 糖 1-2 湯匙
• 白醋 3-4 湯匙
• 蒜頭取材料3粒切細粒 
• 青檸半個榨汁 
• 紅辣椒 3隻切粒

做法 :

1. 白米洗淨隔水，備用
2. 熱鍋落麻油，取2片薑磨成茸及2粒蒜磨成茸炒香，放入白米炒勻
3. 將其餘材料的蔥 ,薑 , 蒜頭 , 乾蔥切件落煲爆香,再放左適量既水(可以浸過雞脾便可),水滾後加1湯匙鹽,2湯匙雞粉,落雞脾煮15分鐘,熄火焗15分鐘,雞脾拎起待涼放入雪櫃,雪半小時or1個鐘(個人喜好,可雪可唔雪)煮雞水便成雞湯
4. 將炒好的白米放入電飯煲內，加入雞湯按製煲飯，飯熟即成

煮雞時間由自己決定,因為唔知你地雞或雞脾有幾大,所以最緊要熟

開頭驚打風去唔成,打完之後又怕果邊天氣唔好,點知隻"浣熊"爬走左之後,我一落機果估熱氣直迫身上,嘩,真係好熱下喎,導遊話今日有32度左右啦,事隔一日,天氣好到你估唔到,完全唔似打過風,真係好好彩!!天公造美!!

Day one :今日有32度,我地第一日係自由活動,享用酒店既設施,因為住海口5星酒店,非常之靚,仲要有個私人沙灘,酒店個泳池係同個海灘一樣水平線咁,好鬼死正架,我當然同老公唔放過佢,游番過靚水先啦,又曬番身靚膚色先!!第一次訓果d吊床,好得意都ok舒服架啵,呢到有好多用椰子做既姐(傘)好有馬來西亞feel,然後周圍影相囉!!咁就可以玩左一日!!

Day two :今日有34度,起身後就要同"海口"講再見喇,因為我地會出發去"三亞",海口去三亞要4個鐘頭時間,咁我地一路坐車就一路參觀景點,去左呢個椰子製造廠,睇住佢即時生產,即係shopping time啦,有好多椰子製成品賣架,我地就買左椰子糖,椰子咖啡,椰子奶,全部都好好食同好飲架,之後去左一個叫"博鱉"既地方,然後再坐船上"博鱉"既島上面,呢個島最突別既地方,就係一面係咸水,另一面係淡水,佢地係同一個沙灘上面,兩者分隔唔係好遠架咋!!遊完船河之後,就去左睇呢個珍珠館,都係shopping time,但就唔岩我,之後再坐一陣就到到左今次既重點"三亞"喇!!今晚約左d團友去食海鮮呀,嘩又平又好食呀!!行飽食醉又去訓喇!!

Day three : 今日有36度呀,一日比一日熱呀,個天好藍好正呀,食過早餐後,去左個中國小數民族既地方玩,好老實講呢到幾好玩,d屋全部起得好有特色,(我自己好鐘意用木整成既野)仲有真人5秒爬上樹,擲椰子,即擲即刻開黎飲我都係第一次咋,幾甜幾好味架,之後睇下表演!!同時係呢個村我見到好多椰子樹.芒果樹.香蕉樹,因為呢到係亞熱帶氣候,所以呢到好適合生果身長,仲要全部都好甜好好味!!跟住就當然係重點"亞龍灣"遊水啦,一去嘩!!果然聞名不如見面,亞龍灣擁有東方夏威夷之稱,真係好靚,唔係講笑,水好清,沙好幼,今日仲要天好藍雲又好白,唔係誇張架全部係事實,真係好鬼靚架!!我仲同老公獻出左我地既第一次,就係潛水喇,好專業架用晒氧氣樽架,每位$380就可以,我未試過架有少少驚同緊張,因為怕唔識呼氣呀,坐小船去左一個浮台既地方,有教練教完你點玩之後,就可以去潛水架喇,教練同你講講下野就會叫你慢慢試下口抖氣,之後無題就帶你去深d,係水入面既感覺係又驚又好得意咁,之後就覺得好靚,仲好多珊瑚同好多魚呀,仲有見到海膽呀,好得意呀!!大概半個鐘到就玩完架喇,之後番左沙灘再玩水!!因為掛住玩係亞龍灣影左好少相咋!!食完個5星級大餐之後,就訓喇,今日勁開心!!

Day four :今日無咁熱喇,28度有少少風,今日天色都麻麻地呀,可能知道我地走喇,因為今日坐2:10機,所以行程係坐車番上去海口美蘭機場呀,坐4個鐘訓足3個鐘琴日玩得太勁喇!!要同海南島講再見喇!!

總括:今次海南島之旅,係好好玩架,海南島無工業,吒到既屋好少層數,所以空氣好好,無污染天真係好藍,同咪海南島1年4季都可以游水,仲有周圍都係椰子樹,全部都好多椰子架!!最開心當然係潛水,玩完覺得上左隱,鐘意游水可以考慮下海南島,我會再去!!

因為相太多,未能全部上載!!大家可有興趣可以去http://www.xanga.com/keikei_kwok

or http://www.slide.com/r/GCRyLMX45z8Ckr4TIRJ1v8OaUzAbCdd2?previous_view=TICKER&previous_action=TICKER_ITEM_CLICK&ciid=504403158682945485 有得睇架!!

琴日陪媽媽行街市,行過一間鋪頭,佢話呢間叉燒又靚又好食,我忍唔住買左$10!!番到屋企又唔知拎d叉燒整咩好??老板話整叉燒飽囉!!嘩!!會唔會好難整呢??未整過喎!!死就死啦,反正有白老鼠!!上網睇食譜啦,之後先整好叉燒先雪左一日,今朝就試下整!!我第一次搓皮,有少少雞手鴨腳,因為好痴手,最後都成功包晒,個樣都算似似地!!試食時間~~~唔!!唔錯呀,比想像中好味,個味道都有8成相似,呢間d叉燒又真係幾好味喎,老板一食落去d汁流出黎,熱辣辣咁,佢大叫好味喎!!哈哈!!甜在心即刻!!

包皮材料:

麵粉200g   生粉40g      發粉 6g

乾依士4g   砂糖24g 鹽2g     油二湯匙  

清水 100ml       脫脂奶40ml    

做法 :

1. 叉燒餡料我預先一晚整 ,先炒香蒜頭同洋蔥,加酒爆香,除叉燒外所以調味料一齊再煮(試試味道睇下岩唔岩自己口味),煮到有少少杰身可熄火,熄火後再加叉燒搞勻,待涼放入雪櫃!!我雪左一晚!!

2. 包皮發酵製法:先將水+鹽+乾依士搞勻等15分鐘後留用

3. 麵粉, 生粉,發粉篩過後 +鮮奶 +糖+油+ 乾依士水全部用手搓勻,搓5-8分鐘至滑身既粉團

4. 然後將粉團放係碗到等發酵40-50分鐘,用濕布蓋係面

5. 發酵完之後,拎出再搓至唔痴手,之後再分10-12份壓平,將叉燒餡料包入,加一張焗爐紙係底,再放15分鐘可以令飽鬆弛d,最後大火蒸8-10分鐘即成!!

叉燒餡料我就無加生粉水,因為叉燒醬應該會越煮越杰,如果唔杰自行再加生粉水但又唔好太杰少少杰就ok!!

雪一晚係想易d包,如果太濕d皮好難包!!